الثلاثاء، 6 سبتمبر 2011

عن غزة أتحدث ...



بما انه التدوينة عن غزة .. فلغزة الحق أن اتكلم بالغزاوي العامي  .. فسامحونا المرة ...


سنة وأكتر بعيدا ً عن غزة وبحر غزة وناس غزة ومآسي غزة ... 
شغلات كتير في بالي بتيجي لما بتذكر غزة ... مش عارف شو صارلها ... هل تغيرت ولا زي ما هي ؟؟ 
هل لسه صوت مواتير الكهربا زي ما هوا وأنت بتمشي بعد المغرب في أي شارع عام ؟
الكهرب لساتها بتيجي بالدور ولا بطلت تيجي أصلا ً :) ؟
هل لسه السواقين بيدوك شوكلاته او باكيت " فاين " بدل النص شيكل عشان مش ملاقيين فكّة :) ؟؟ 
هل لسه آثار البيوت والمباني الحكومية المهدّمة من الحرب لساتها زي ما هي .. ولا شالوها ؟
هل الأزهر لسه بيعلق دوامه كتير ؟؟؟ 
هل موضة الهجرة لسه منتشرة بين الشباب ؟؟؟ 
هل الناس لسه بتقول مقولاتها المشهورة زي " حبيبي ياحج " و" قلق "  , ولا في اشي جديد نزل على الخط  ؟؟؟ 
هل " جنزير" الدبابة اللي فجروها في الحرب لساته موجود على مفترق أبو مازن ؟؟؟ 
هل ارسال شبكة جوال لساته تعيس ولا انعدل حاله ؟
هل موضة الموتوسيكلات موجودة لسه بحوادثها المروعة ولا قلّت ؟
أبو طلال تاع الفلافل  يا ناس لسه فاتح والشيخ تاع الشاورما  شو صار معه :) ؟
شو آخر مكتب NGO  سكّرته الحكومة في غزة ؟؟ 
هل بحر الزوايدة والوسطى لساته نظيف وفلة ؟؟؟ 
العاصمة الاقتصادية للقطاع .. رفح شو صارلها ..؟ في ناطحات سحاب فيها ولا لسه ؟؟ 
هل موظفي رام الله لسه قاعدين ؟ ولا شو بيعملوا ؟؟؟ 
هل الناس لسه بتروح وبتيجي من الأنفاق ؟؟
هل صحيح بلزمني ساعتين في ايدي عشان احنا بلد مترامي الاطراف وفي فرق ساعه بين جناحي الوطن ؟؟ 
شغلات كتير كتير في بالي .. مش عارف في أول زيارة كيف حيكون الوضع  ... بس الأكيد انه مشتاقلها كتير كتير لغزة ... بكل تبعاتها ...........


عن غزة حدثتكم .. فجاوبوني ... :)



هناك 9 تعليقات:

  1. يا سيدي لا تقلق غزة على حطة ايدك ;)
    بس اللي تغير فيها انو ال CSS Team تفرق و صار كل واحد في جهة
    هههه
    على الهامش : مدونة فظيعة و احسيسك عالية كتير
    keep up the good work ;)

    ردحذف
  2. السلام عليكم:
    أهديك هذا الرابط (اللي بيرفع الراس) عن غوه وأهلها
    الطفل محمد سفيرا لجوجل في غزه

    ردحذف
  3. نيال غزة بابن بيشتاقلها متلك :)
    غريبين إحنا لما نكون جواتها بنضل نشكي و بس نطلع بيسكنّا الحنين إليها .. ما بعرف شو صار فيها بعد الغياب .. بس متلك مشتاقة لبحرها و تفاصيلها الزغيرة ..

    عذب نثرك يا أحاسيس :)

    ردحذف
  4. مازالت غزة كما هي .. ناسها هم هم ومواتير الكهرباء هي هي ،، والشوارع والجنزير

    والكهرب لساتها بتيجي بالدور
    اماالسواقين لسه بيدوك شوكلاته او باكيت " فاين " بدل النص شيكل عشان مش ملاقيين فكّة .
    وآثار البيوت والمباني الحكومية المهدّمة من الحرب لساتها زي ما هي .
    والأزهر لسه بيعلق دوامه كتير
    وموضة الهجرة لسه منتشرة بين الشباب ؟؟؟
    والناس لسه بتقول مقولاتها المشهورة زي " حبيبي ياحج " و" قلق " ,بالاضافة إلى " حريقة ! " وغيرها
    وارسال شبكة جوال لساته تعيس ومانعدلش حاله.
    وموضة الموتوسيكلات موجودة بحوادثها المروعة
    أبو طلال تاع الفلافل والشيخ تاع الشاورما على حطة ايدك .
    بالنسبة لاخر مكتب NGO سكّرته الحكومة في غزة مابعرف بصراحة !!
    و بحر الزوايدة والوسطى لساته نظيف وفلة وشمعة منورة
    اما بالنسبة للعاصمة الاقتصادية للقطاع .. رفح لسه مافيها ناطحات سحاب
    وموظفي رام الله لسه قاعدين !
    والناس لسه بتروح وبتيجي من الأنفاق .
    بالنسبة للساعتين ، اه لسه بدنا نلبس ساعتين في ايدينا !
    ان شاء الله بنكون افدناك وجاوبناك على سؤالك ..

    ردحذف
  5. معتصم :
    تسلم تسلم ابو العبد :) سعيد جدا جدا والله بمرورك وتعليقك :)

    ابن الإيمان:
    ما شاء الله ... غزة مليئة بالطاقات والقدرات .. لكن اوضاعها اصعب بكتير من هذه الطاقات للأسف

    ردحذف
  6. هديل :
    تسلمي يارب .. غزة دائما ً في البال ..

    وجع البنفسج :
    تسلمي يا رب ... اسئلتي من دافع شوقي لغزة :(

    ردحذف
  7. غزة في سر غريب .....لما بدنا نطلع منها بنروح وبنجري وبنعمل المستحيلات , بالاخر بنشتقالها وكتيييييير كمان , بس نسيت تسأل عن معبر رفح :)

    وشكرا على التعليق و زيارة مدونتي

    تحياتي

    رشا

    ردحذف
  8. بالتوفيق والسداد
    تحيتي ومودتي

    ردحذف
  9. سكر زيادة :
    معبر رفح صحيح شو اخباره ؟

    العفو ..تسملي

    محمد ملوك :
    تسلم يا محمد ونوّرت :)

    ردحذف